Il Napoli ha due giornali in rima, solo uno in napoletano: ‘Onapule.it » o napule

PARMA-NAPOLI 1-3

admin — Sun, 13 Mar 2011 23:55:06 +0000

Schiattamuorte e profeti di sventura,
vuje ca già ce davate pe’ finiti,
comm’a mettite mò? State serviti,
stu Napule ripiglia a fà paura!

All’inizio parimmo addurmentate.
‘O Parma se fa sotto (poverino…),
e fa nu bellu gol cu Palladino.
Scetate ciuccio, oppure so’ mazzate!

E cu Lavezzi arrivano ‘e turmiente:
fa signà a Marekiaro (in fuorigioco…)
Ma stu pareggio è breve, dura poco,
pecchè ‘o Pocho va in gol personalmente.

Doppo sti’ doje papagne ‘nfaccia’o musso
è ‘a guerra. La tensione se fa troppa;
a gamba tesa vo’ trasì Galloppa,
ma nun galoppa chiù: se piglia ‘o russo.

Ce dispiace pe’ vuje, cari parmensi:
‘a tiempo senza Scala, e senza Pioli,
pe’ sagliere, arrangiatevi da soli.
Intanto, grazie azzurri: siete immensi!

Clicca qui per vedere il video incorporato.

MILAN-NAPOLI 3-0

admin — Mon, 28 Feb 2011 23:05:39 +0000

E’ stato overamente nu peccato:
chello ca se sunnava, nunn’è stato.
Fuje na granda surpresa: che peccato
c’o Napule al Meazza nun c’è andato!
Pur int’e spogliatoie hanno cercato,
però niente da fà: nun s’è truvato.
E ‘o sapimmo: fuje pure nu peccato
ca ‘o Pocho nuosto, trisqualificato
st’incontro nun l’ha proprio di/sputato.
E cuntinuann’a dicere: peccato
ca st’Aronica è tanto scoordinato!
Può darsi pure can nun l’ha tuccato,
ma ‘o braccio, pecchè canchero l’ha aizato?
Napule, ‘a verità: fuje nu peccato
ca chello ca s’è visto ncopp’o prato
nunn’ere tu, ma ‘o Brutto Addormentato.

Ma basta mò. Chello ch’è stato è stato.
E po’ chi sa, si overo è nu peccato:
doppo stu paliatone c’ha pigliato
‘o Napule sarrà chiù rilassato….
e dummeneca è ancora campionato.
Il sogno nunn’è muorto: è rimandato!

NAPOLI-FIORENTINA 0-0

admin — Sat, 15 Jan 2011 23:37:34 +0000

Pecchè ‘o napulitano è sicc sicc?
Pecchè da sempe s’è abituato al poco.
Così, quann’uno ‘o dice: “Mò si’ ricco”,
se cunfonne, se ‘nzama: e sbaglia ‘o gioco.

“Site siconne!” E nuje cadimmo a funno:
vene comm’a na specie ‘e scemanfù.
Addò è fernuta ‘a voglia e spaccà ‘o munno,
chella cuncentrazzione, addò sta chiù?

Al posto d’o slovacco, ‘o Principito:
nunn’ammiscammo ‘a lana cu la seta!
Ce lo ricorda ‘o pubblico, imbelvito:
“Sosa, nun tiene l’esse: tiene ‘e zeta!”

D’e nuoste, in poche ‘a guidano, sta nave.
Su tutti, certamente Cannavaro,
Grava (ma il suo incidente pare grave),
e joca buono pure Campagnaro.

Lavezzi quacche palla l’ha tuccata,
ma quale azzurro: l’ammo visto griggio.
Pe’ Cavani nu fu na gran serata
(ma pecchè se jucava ‘e pomeriggio…)

Vabbuò:c’accuntentammo ‘e stu pareggio.
Certi partite a vote vanno storte,
e ce puteva annà perzino peggio.
Ma nun se fa accussì, mannaggia ‘a morte!

Clicca qui per vedere il video incorporato.

CESENA-NAPOLI 1-4

admin — Sun, 26 Sep 2010 18:00:57 +0000

Né, si nunn’a vincevemo, ‘a partita,
ce pigliavano in giro pe’na vita.
Dicimm’a verità: sti cesenate
in campo nun se so’ mai presentate.
Contr’o Milàn, vuje foste unnece eroi:
sulamente Parolo, oggi, tra voi.
‘O Napule ‘a partita ‘a tene ‘mmano,
però va lemme lemme: chianu chiano.
Tene palla, gnorsì, controlla ‘o gioco,
ma in porta, come sempre, tira poco.
Po’, non essendo “ciucci”, ma somari,
arriva la ……ata di Cribari:
è n’errore pesante, overo brutto,
ca l’intosseca ‘o juorno d’o debutto.
Chi già s’allamentava p’o pareggio,
si steva male, mo’ sta pure peggio.
Lavezzi leva ‘a spada ‘a dint’o core.
L’arbitro ce regala nu rigore,
ma la vittoria è chiù che meritata.
E chest’è: cà se campa alla giornata…

Clicca qui per vedere il video incorporato.

NAPOLI-UTRECHT 0-0

admin — Thu, 16 Sep 2010 23:55:57 +0000

Doppo tant’anne, se ritorna in Coppa:
ma sta partita è meglio e cià scurdà.
Il Napoli è un pulcino dint’a stoppa:
e ‘sti nuove, che belle nuvità!

Nun ce pareno piezze da novanta:
certo, vanno inserite dint’a rosa,
ma “o principito” sembra un principiante
(nunn’era meglio ll’ato: ‘o Pampa Sosa?)

Tra ‘e nuove acquiste po’ ce sta Yebda.
Quest’algerino overo fa paura:
in lui, chello ca chiù se fa nutà
nunn’è ‘o palleggio: è la pettinatura.

C’è pure Lucarelli, nel finale
(Mazzarri dice “Trase!”, ‘a copp’a mano),
ma nun cumbina niente. Inizia male
l’avventura del povero Cristiano…

E ll’ate nun parlammo, pe’ favore.
A cummencià, se resta senza voce.
Uno d’e “viecchie”, chiù ca giucatore
pare n’esclamazione: “Santa croce…!”

Cu st’olandese, comme contr’o Bari
(chi capisce ‘e pallone, certo ‘o vere),
fuje nu successo a ce piglià nu pari.
Azzurri, rispunnite; che succere?

CHIEVO-NAPOLI 1-2

admin — Sun, 02 May 2010 19:08:43 +0000

‘A Ciempions, nuje c’a simmo già scurdata:
sulamente na cosa mò ce resta.
Avimma fà ca all’urdema jurnata
‘a squadra nunn’è settima, ma sesta.

C’o sesto posto – l’e capito, tu? –
‘o Napule starrà senza fa niente
ncopp’a na spiaggia, vinte juorne ‘e chiù.
Settimo, è ‘o piazzamento d’e fetiente:

pecchè si nun reposa int’all’està
‘o jucatore, l’anno ca mo’ vene,
a marzo sta già stanco: nun c’a fà,
e p’o finale, forze nun ne tene.

Stu fatto le dicette, isso, Mazzarri:
“Si nun vattite a sti scamorze ccà,
v’aspetta na staggione di catarri”.
E tuttequante in coro: “S’adda fa!”

Pe’ stà chiù tempo sott’all’ombrellone
l’avimme viste correre, e sudare.
‘O messaggio ‘e ll’azzurre alla nazzione:
“Napule, sì pe nuje, squadra da mare!”

Clicca qui per vedere il video incorporato.

NAPOLI-CAGLIARI 0-0

admin — Sun, 25 Apr 2010 20:32:20 +0000

Nun ce se po’ passà, pare incredibbile:
quanno jucammo contr’e squadre sdrucciole,
comm’a nuje: cu l’accento comm’ a “Nàpule”,
c’ammeretassemo na faccia ‘e pacchere.
E’ strano: comme fosse un fatto maggico,
cu lloro nun vencimmo: e chest’è traggico.
E nunn’è ca so’ squadre irresistibbili:
song’o Mòdena, ‘o Màntova, e po’ l’Empoli.
Chest’anno grazie ‘o cielo, ‘e squadre sdrucciole
so sulamente doje: Gènoa e Càgliari.
Comm’è ghiuta? La cosa è immagginabbile:
tre pareggi, e na scoppola impensabbile.
Ogge, cu chille scise a copp’all’isola,
a ‘o Napule venette na paralise:
pecchè? Chi ‘o ssape: s’adda fa l’analise…
‘O Palermo sta in orbita, è imprendibbile:
acchiappà ‘a Sampdoria, è impraticabbile.
‘A Juve? Tutti alluccano: “E’ inguardabbile!”,
ma mò c’ha superato (in pianta stabbile…?)
Forse, a restà addo stammo, è chiù possibbile:
chistu settimo posto, è difendibbile?

Clicca qui per vedere il video incorporato.

BARI-NAPOLI 1-2

admin — Sun, 18 Apr 2010 19:33:30 +0000

Mo ca nun tene chiù motivazione,
‘o Bari scende in campo scoglionato.
Se vuleva salvà: già s’è salvato,
pirciò corricchia areto a stu pallone:

a se fa ‘o mazzo tanto, che l’importa?
Pe chesto, chi è trasuto al San Nicola
in campo ce truvaje na squadra sola:
‘o Bari ha fatto sulo un tiro in porta.

E nuje? Nunn’ è c’avimmo entusiasmato:
abbiamo fatto una partita onesta,
ca però c’è abbastata pe’ fa festa,
e pe’ ce purtà ‘a casa ‘o risultato.

A jucà buono sono stati in tanti:
salutammo ‘o ritorno ‘e Santacroce,
e poì gridammo in coro, a piena voce:
si tu, Lavezzi, ‘o nuosto centravanti!

Clicca qui per vedere il video incorporato.

NAPOLI-JUVENTUS 3-1

admin — Thu, 25 Mar 2010 23:45:09 +0000

‘O pallone, se sape, è sulo chesto:
“ ‘a malatìa”. La caccia ad un “bel gesto”.
Chiellini, andato in gol pe’ distrazione
d’e nuoste, esulta comm’a nu scignone,
scazzottannose ‘o pietto cu li mmane.
Ma tu si’ n’ommo, o si’ n’urangutan?
Po’ vene pure ‘o gesto ‘e Marekiaro.
Sbaglia ‘o rigore (fatto quase raro),
ma doppo fa nu granne gol ‘e testa.
Currenno miez’o campo pe fà festa
ch’e mane, se pulezza tutt’a maglia
( “vavattenne malocchio, e chi m’o scaglia!”)
A n’atu ppoco, segna Quagliarella,
e ccà accummencia n’ata tarantella:
se va tuglienno ‘a povere d’e spalle
(“Né critici, levateve d’e …..”):
e po’ c’a mano, mima ‘o “quaquaqua”
(“Site buone sultanto a criticà…”)
Jucatore, mò basta. Nun ve tocca
a parlare c’e mmane, e cu la vocca.
Da adesso in poi, facitece ‘o piacere:
ogne cosa, dicitela ch’e piere!

Clicca qui per vedere il video incorporato.

NAPOLI-FIORENTINA 1-3

admin — Sat, 13 Mar 2010 23:58:57 +0000

Sta serata è nu vico ca nu sponta:
fa friddo, e ncopp’o campo vott’o viento.
Si ‘o Napule ha perduto: si s’è spento
è pecchè nun tenimmo ‘a primma ponta.

‘A verità, fuje amara, ‘a medicina.
Sta scunfitta ce coglie all’intrasatto:
nun se perdeva d’ò duimilequatto,
e po’ è venuta chesta Fiorentina.

‘A squadra loro è forte chiù d’a nosta,
pecchè teneno ‘o bomber: ‘o cecchino.
E s’è visto: se chiamma Gilardino,
e a nuttata fuje nera comm’a gnosta.

A un certo punto stevemo in vantaggio,
po’ c’hanno tolto un calcio di rigore.
Ma quann’a scusa è bona, pe’ favore,
è meglio can nun s’usa, dice ‘o saggio.

I’ mo v’o dico, ‘o fatto comm’è ghiuto:
è stata na questione ‘e malasciorta.
Ogne cosa, stasera, è andata storta;
sulamente pe chesto s’è perduto.

All’inizio è tranquillo, ‘o Presidente,
ma po’ s’agita, e parla dell’America:
le sta quase a venì na crisi isterica.
Calmate, Aurè, nunn’è succieso niente!

Clicca qui per vedere il video incorporato.