Il Napoli ha due giornali in rima, solo uno in napoletano: ‘Onapule.it » napoli

NAPOLI-BRESCIA 0-0

admin — Sun, 06 Mar 2011 18:36:52 +0000

Già se sapeva, doppo ’e doje nuttate
(al Meazza, e chiù primma, ‘o Madrigale)
ca c’o Brescia suffrevemo. E’ normale:
lasciano sempe livide, ‘e mazzate.

‘O primmo tiempo, ‘o gol certo ce steva:
pe nu pilo nunn’a mettimmo in porta.
Avimmo avuto pure ‘o poco ‘e ciorta,
e pe chestu motivo jammo in freva.

Ma int’a ripresa ‘o Napule s’affloscia:
addeventà chiù lento, e po’ s’imballa.
E’ overo, sempe nuje tenimm’a palla,
ma ‘a manovra è nu guajo: è troppa moscia.

Né, sul finale, ‘o Brescia nun s’allanza?
Traseno Lucarelli, e poi Yebda,
però accussì ‘a difesa nun c’a fà,
e rischiammo doje-tre dulur’ e panza.

E mò? Facimm’a corsa su noi stessi.
Vanno sempe chiù forte, ‘e milanese.
E nunn’è ca tenevem’e pretese:
nuje simme sognatore, mica fessi!

Clicca qui per vedere il video incorporato.

NAPOLI-LIVERPOOL 0-0

admin — Thu, 21 Oct 2010 23:46:24 +0000

I che serata, che malincunia!
No pe’ bbia d’o destino chiù maligno:
a rovinarla è stata ‘a polizia
contro’ e poverecriste di Terzigno.

Ma ncopp’o campo nun ce steva, ‘o ffuoco.
Contr’a squadra d’e quatto scarrafone
avimme fatte overamante poco,
e alla fine, fuje grann’a delusione.

‘O Napule, guardingo e timoroso,
pure si nunn’a fatto stravedè,
mo’ è stanco, e s’adda mettere a riposo.
A chi serve sta Coppa, Presidè?

SAMPDORIA-NAPOLI 1-2

admin — Sun, 19 Sep 2010 23:55:07 +0000

‘O Prutettore nuosto è straordinario:
‘e miracole ‘e fà pur’o cuntrario.
Ce mette ‘a mano, e ‘a squadra nun se squaglia.
Gennà, quant’a vuò bene a chesta maglia!
Ma forse, ncopp’o prato di Marassi
nunn’er’o caso ca ti scomodassi:
chella ca tutti avimme viste in camp
era la brutta copia della Samp.
Nnanz’all’uocchie d’a moglie Carulina
Cassano s’arravoglia, se ‘mpappina.
‘O Napule è veloce, corre, assale,
ma pe nu pilo nun fernesce male,
quanno l’arbitro ‘e fischia nu rigore.
E’ nu colp’ e curtiello dint’o core:
a perdere è ‘na beffa, ‘n ingiustizia.
‘A partita è fernuta? Adesso, inizia…
Gargano: ‘na partita delle sue.
‘E passagge ne sbaglia tre su due,
ma doppo coglie in pieno na traversa:
e po’, quanno ogneccosa appare perza,
‘o pesca ‘e precisione, lo slovacco
ca girannose,’a votta dint’o sacco.
Ma chistu risultato nun c’abbasta,
pecchè stasera simm’e n’ata pasta,
e stamme overamente comm’e cani.
Lavezzi ‘ mette al centro pe’ Cavani,
e comme va a fernì, se sape già.
Napule, curre, nun te può fermà!

Clicca qui per vedere il video incorporato.

NAPOLI-BARI 2-2

admin — Sun, 12 Sep 2010 23:12:58 +0000

Jettem’in campo chieni di speranza:
è stasera, ca parte ‘o campiunato,
doppo quinnece juorne de vacanza.
Ma ‘o Napule sta strano, sta stunato:

paren’e primme, e no l’urdeme calde.
Chesta squadra nun parte all’arrembaggio,
comme si ‘e cosce n’e tenesse salde,
e invece ca settembre, fosse maggio.

Stu Napule nun pressa: è titubante,
comme si ‘o Bari (‘a squadra di Ventura)
fosse ‘a chiù forte: ‘a meglia ‘e tuttequante.
Ma cherè: ve mettesseve appaura??
Cavani, annanze (poveru guaglione!)
a lottà, a faticà, nun dice no:
ma sta isolato, chest’è ‘a situazione.
Segna, ritorna, fa chello ca po’.

Contro ‘a na buona squadra comme ‘o Bari
in difesa l’errore nunn’è raro:
pe nu stupido sbaglio, sfuma ‘o pari
(niente nomme: De Sanctis, Campagnaro).

Ma ‘o matador rimette ‘e cose a posto.
Nella ripresa, arretrano ‘e gallette,
ma stu Napule è muscio, e nunn’è tuosto.
Quanno oramaje nisciuno ce scummette,

appena ch’è trasuto un certo Sosa
Cannavaro c’a votta, ‘a palla in porta.
Ma che buò fa? Da cosa nasce cosa,
e segn ‘o Bari: ‘i che serata storta!

‘A verità: guagliù, sinceramente,
ce piacesse ‘e verè coccos’e chiù.
Nun l’avimme cu te, né Presidente,
quanno alluccammo: “Mo’, ciuccio, fa’ tu!”

Clicca qui per vedere il video incorporato.

SAMPDORIA-NAPOLI 1-0

admin — Sun, 16 May 2010 18:30:19 +0000

Già se sapeva: steva tutto scritto.
Quanno so’ scarse li motivazzione,
pure si tiene a unnece campione
‘a copp’o campo sempe jesce scunfitto.

‘A Samp l’adda piglià, stu quarto posto:
nuje, si perdimmo, nun c’importa niente.
‘A cosa, ‘o vvide, è molto differente;
‘e sta tranquillità pavammo ‘o costo.

Nunn’è ca s’aizaje bannera janca:
però nuun’era ‘a gara della vita.
C’a jucaimo ‘o stesso, la partita,
però c’a panza chiena, e ‘o cunto in banca.

Aurè: te l’e guardato a stu Pazzini?
Mò nun dicere: cheste so’ pretese.
Nun vulimm’ o fenomeno barese,
ma ‘o centrattacco sì! (Pur’a Mannini…)

E se n’è ghiuta pure sta staggione.
Cu Mazzarri, l’azzurre, frische e toste,
remmanetteno sempe ‘e primme poste:
e ce ne detteno, ‘e suddisfazzione.

‘E gioie chiù importante; ‘e chiù sincere?
Pure si assummigliante, comme mossa,
a tirà scuppettate ‘a Croce Rossa:
battere pe doje vote ‘e bianconere!

Vabbuò, nu’ ghiammo in Coppa dei Campioni:
però – dalla classifica se vere –
cosa ca raramente ce succere,
stamme primma d’e muorte ‘e Zaccheroni!

Nun c’a facette, a Roma. E li penzieri
(‘e ‘mbruoglie, ‘e premie a vencere c’o Siena:
chi crere a chesti ccose, me fa pena),
so’ differente a chille ch’eran-ieri.

Cumplimente, Moratti, pe’ stu bis:
doppo la Coppa Italia, e lo scudetto,
na cosa sulamente ‘a te m’aspetto:
ca sabbato, a Madrid, faje pur’ ‘o tris!

Clicca qui per vedere il video incorporato.

NAPOLI-ATALANTA 2-0

admin — Sun, 09 May 2010 19:02:02 +0000

‘E fatica ce n’è voluta tanta:
difficile a chiegà chest’Atalanta,
ca corre: nunn’è certo n’Ata/lenta,
in specie cu’ Valdez, e cu’ Guarente.
Ma ‘o Napule ogge tene nu tridente:
e ‘a ponta chiù appuntuta, pare chella
ca currisponne a Fabio Quagliarella.
Vencimmo: e fin’a ccà, tutto normale.
Ma succere coccosa di speciale:
‘o Parma, ca c’aveva castigato,
ha ripetuto ‘ o stesso risultato
vattenno la Juventus in trasferta.
‘A porta dell’Europa nunn’è aperta:
è spalancata. E scoppia l’esultanza:
l’azzurre hanno salvato la vacanza!

Clicca qui per vedere il video incorporato.

BARI-NAPOLI 1-2

admin — Sun, 18 Apr 2010 19:33:30 +0000

Mo ca nun tene chiù motivazione,
‘o Bari scende in campo scoglionato.
Se vuleva salvà: già s’è salvato,
pirciò corricchia areto a stu pallone:

a se fa ‘o mazzo tanto, che l’importa?
Pe chesto, chi è trasuto al San Nicola
in campo ce truvaje na squadra sola:
‘o Bari ha fatto sulo un tiro in porta.

E nuje? Nunn’ è c’avimmo entusiasmato:
abbiamo fatto una partita onesta,
ca però c’è abbastata pe’ fa festa,
e pe’ ce purtà ‘a casa ‘o risultato.

A jucà buono sono stati in tanti:
salutammo ‘o ritorno ‘e Santacroce,
e poì gridammo in coro, a piena voce:
si tu, Lavezzi, ‘o nuosto centravanti!

Clicca qui per vedere il video incorporato.

LAZIO-NAPOLI 1-1

admin — Sat, 03 Apr 2010 23:57:28 +0000

Pecchè, doppo cacciato a Ballardini,
se pigliaje Edy Reja, chillu Lotito?
‘O ssanno tuttequante, anche ‘e bambini:
cumm’è, ca sulo tu nun l’e capito?

Pe fà, l’anno che vene, ‘a serie B!
“Visto che a forza ce dovemo annà,
ce pijamo un esperto: questo qui,
così ce cominciamo a preparà…”

Edy, scusa, pe chesta cattiveria:
t’avimma dice sulamente grazie.
Però la situazzione è molto seria:
‘a toja, purtroppo, e chella della Lazio.

E’ na squadra irritabbile e nervosa,
ca specialmente è fraggile in/difesa.
Se al Napule ‘a capeveno, sta cosa,
di sicuro ‘a facevano, l’impresa.

Ma ncopp’o campo, il Napoli non c’era:
si ce steva, pareva assaje distratto.
Già senteva ‘o profumo d’a pastiera:
già vedeva ‘o capretto dint’o piatto.

E ‘o vedettemo tutti, comm’è ghiuta:
doppo ca Marekià signaje ‘o pareggio,
‘a partita, int’a n’attimo, è fernuta,
E va buono: meglio chesto, ca peggio.

Accussì c’a magnammo, sta menesta.
Mò facimmoce Pasca: bona festa!

Clicca qui per vedere il video incorporato.

NAPOLI-CATANIA 1-0

admin — Sun, 28 Mar 2010 18:26:36 +0000

Ch’e frate Fabio e Paolo Cannavaro
‘o destino nun fuje di certo avaro.
A tutt’e doje facette bei regali,
ma nunn’e dividette in parti uguali.
Fabio, chiù curtulillo e chiù scattante,
suddisfazione ce n’a avute tante:
capitano nell’ultimo Mondiale,
‘o chiù presente della Nazionale,
facette – tanno – il suo capolavoro
vencenno pure nu’Pallone d’oro.
Paolo accussì importante nunn’è stato:
in Nazionale nunn’a maje jucato,
e pure si s’è sempe fatto ‘o mazzo,
in carriera nunn’a vinciuto un ….
Chiù àvuto, e chiù gruosso d’o fratello,
però meno aggrazziato: meno bello,
pareva, ‘a piccerillo, destinato
a fa ‘a parte d’o frate sfurtunato.
‘O dicevano tutti, all’occasione:
“Chist’è ‘o fratello scarso d’o campione!”
L’anno scorso esplodette ‘o malcontento:
“Tene ‘e piere ‘e lignamme, è scemo, è lento!”
Paolo s’abbatte: “E mò che pozzo fa?”
Sta quase pe’ decidere ‘e lassà,
ma na voce le dice: “Dai, resisti!”
E adesso so’ luntani i giorni tristi:
int’a difesa, ognuno ‘o po’ vedè,
‘a cummanna isso: è un principe, nu rre.
Con il Catania, Paolo Cannavaro
spingennose int’all’area, da corsaro
fa ‘a primma rete azzurra in serie A.
Paolo, ccà, pe te: tre vote urrà!

Clicca qui per vedere il video incorporato.

NAPOLI-JUVENTUS 3-1

admin — Thu, 25 Mar 2010 23:45:09 +0000

‘O pallone, se sape, è sulo chesto:
“ ‘a malatìa”. La caccia ad un “bel gesto”.
Chiellini, andato in gol pe’ distrazione
d’e nuoste, esulta comm’a nu scignone,
scazzottannose ‘o pietto cu li mmane.
Ma tu si’ n’ommo, o si’ n’urangutan?
Po’ vene pure ‘o gesto ‘e Marekiaro.
Sbaglia ‘o rigore (fatto quase raro),
ma doppo fa nu granne gol ‘e testa.
Currenno miez’o campo pe fà festa
ch’e mane, se pulezza tutt’a maglia
( “vavattenne malocchio, e chi m’o scaglia!”)
A n’atu ppoco, segna Quagliarella,
e ccà accummencia n’ata tarantella:
se va tuglienno ‘a povere d’e spalle
(“Né critici, levateve d’e …..”):
e po’ c’a mano, mima ‘o “quaquaqua”
(“Site buone sultanto a criticà…”)
Jucatore, mò basta. Nun ve tocca
a parlare c’e mmane, e cu la vocca.
Da adesso in poi, facitece ‘o piacere:
ogne cosa, dicitela ch’e piere!

Clicca qui per vedere il video incorporato.