Il Napoli ha due giornali in rima, solo uno in napoletano: ‘Onapule.it » ilnapoli

NAPOLI-UDINESE 0-0 (in napoletano)

admin — Sat, 19 Sep 2009 21:30:50 +0000

All’inizio ‘e tenevem’, e pretese:
dammo quatto pallune all’Udinese
e alla fine, schiattandoce d’e rrisa,
“Avite visto, o no? Ma quala crisa!”
E invece, ‘o risultato fuje diverso.
E’ già buono ca nunn’avimmo perso:
si ci’o deveno, ‘o gol, a Di Natale,
può stà sicuro ca ferneva male.
Certi vvote ‘o pallone è propio strano:
contro a questo Marino friulano
jucaimo, l’anno scorso, alle diciotto.
‘O primmo tiempo l’amme mise sotto,
ma doppo se scetaje stu Quagliarella,
e facette ‘na rete troppa bella.
Oggi ‘o mercato ha arravugliat’e carte,
e Fabio, ca mò sta da chesta parte,
nunn’a capito manco addò sta ‘a porta.
Tifoso, che buò fa? Zitto, e supporta:
se sape, godarrà chi s’accuntenta.
Ma de ‘na squadra uallarosa e lenta,
che d’a palla nun sape c’adda fa,
nun ce putimme propio accuntentà.
Lavezzi, solo tu, miez’a stu campo
aviste – ‘o nomme è nomme! – quacche lampo.
Nun parlammo d’a prova di Gargano:
è diventato overo un caso umano.
“Cambierà tutto, miercurì a San Siro”.
Guagliò, ma a chi vulite piglià in giro??
Donadò: prendi in mano ‘a situazione
ca sinò nun t’o magne, ‘o capitone!

Clicca qui per vedere il video incorporato.

PALERMO-NAPOLI 2-1 (in napoletano)

admin — Sun, 23 Aug 2009 21:00:08 +0000

Maggio, ‘e cose ca fai nun so’ normali.
Pigliaste, ‘o primmo tempo, ben tre pali:
doje – belli! – dint’a porta d’o Palermo,
e ‘o terzo, quanno si’ rimasto fermo
annanz’a porta nosta, ‘mbambulato:
è arrivato Cavani, e t’ha strunzeato.
Chiù tarde, a tre minute d’o pareggio,
nu’ cumpagniello tuo facette peggio.
Zunì, bell’e papà, facce ‘o favore:
l’eva fà proprio, ‘o fallo da rigore??
Doje fesserie, doje gol. E jammo in freva.
Nu Napule accussì nun se vedeva
d’o novembre passato: ‘a nove mise.
‘O Palermo è crollato: è ghiuto ‘ncrise,
c’è legni, pe tre vote s’è salvato:
po’ s’è trovato in mano ‘o risultato.
Si pigliave ‘o pareggio, Zenga mio,
aviva vasà ‘nterra, t’o dic’io.
E invece…cu stu mafaro scassato
forse hai ragione: ‘o vinci, ‘o campionato!
Na sconfitta accussì, fa mal’o core.
Tra chesti curtellate, ed il calore
‘e n’estate vullente, amici belli,
fernimme tutte ‘ncopp’e Cardarelli!

Clicca qui per vedere il video incorporato.

CATANIA-NAPOLI 3-1 (IN NAPOLETANO)

admin — Sun, 24 May 2009 19:50:49 +0000

“Penultima: n’abbasta a ringrazià,
Pataterno – è ‘a preghiera d’o tifoso, –
ca chesta squadra nun se po’ guardà:
sta concludenno in modo vergognoso”.

Sissant’anne, faceva ‘o Presidente:
nu rialo l’avesse assaje gradito,
ma ‘o Napule nun se ne fotte niente.
Trasferta? ‘O mazziatone è garantito.

Primma faceva friddo, e mò fa caldo:
chest’afa è nu turmiento, na tortura.
Ma ‘o Napule nun tremma, e resta saldo:
chi se ne ‘mporta, d’a temperatura?

Comm’era na latrina a zero gradi,
pure è a stessa latrina a trentadue.
Se cagnan’e città, cagnan’e stadi,
ma la squadra remmane sulle sue;

ma mò è sagliuta pure ncopp’e nostre.
Nun ce sta chiù na briciol ’e pacienza:
basta, guagliò, scennite ‘a copp’e giostre.
L’anno ca vene, ‘e vuje facimmo senza!

Clicca qui per vedere il video incorporato.

LECCE-NAPOLI 1-1 (IN NAPOLETANO)

admin — Sun, 10 May 2009 20:40:05 +0000

Lecce: scrive “barocco”, e liegge “brocco”:
chesto succede, si ce lieve l’ ”a”.
Mò pe’ stu Lecce nun ce sta chiù sbocco:
‘a primma serie l’adda salutà.

Nun se po’ dì ch’è stata ‘a malaciorta:
sta squadra nunn’o tira areto, il piede,
ma certi vvote la coperta è corta:
si attacche, doppo rischi il contropiede.

Datolo, l’argentino ossigenato
scenne, e ncopp’a sinistra dà a Pià,
ca stà isso sulo, e sblocca ‘o risultato:
nunn’o puteva propeto sbaglià!

‘O Lecce, giallorosso, vede rosso,
e pe’ ce ripiglià, ce mette ‘o core.
Mannini zompa, e ‘a palla ‘o sbatte addosso:
pe l’arbitro (stu chiaveco!) è rigore.

Dint’a ripresa, tira tutt’e frecce
‘a squadr’e casa: fosseno pesante
tre punte – si ‘e pigliasse – pe’ stu Lecce:
vers’a salvezza, un grosso passo avante.

Nu’ passo ca nun fa chillo, Navarro,
ca (forse) para dopp’a linea janca:
steva propio pe’ cumbinà nu ‘nzarro…
Al finale la squadra pare stanca,

nun c’a fa chiù. Sta quasi per crollare,
ma ‘a traversa protegge ‘o risultato.
‘A salvajemo, ‘a faccia, al Via del Mare.
Né: ma quanno fernesce, ‘o campionato?

Clicca qui per vedere il video incorporato.

JUVENTUS-NAPOLI 1-0 (IN NAPOLETANO)

admin — Sat, 28 Feb 2009 21:10:00 +0000

Dicimmuncelle chiare, assera assera:
qualcuno se puteva immagginà,
jamme, ca c’a putevema jucà:
ca se venceva contr’e bianconere?

Nuje no, nun ce l’avimme maje sunnato,
pecchè ‘e tenimme chiare int’a memoria
‘e fatte ca so’ scritte dint’a storia:
nuje cà perdimme sempe. E’ nu peccato,

pecchè na Juve tanto inconcludente,
senza Camoranesi e Sissoko
cu’ Trezeguet chiù fermo ‘e nu cummò,
nunn’è c’a ritrovammo facilmente.

‘A nosta fuje na gara dignitosa:
pure nu par’e guizzi, e quacche sprazzo.
A tirà, chesto no: manco p’o ….,
(‘a squadra dell’andata è n’ata cosa),

ma per lo meno, jà, nun fuje nu strazio.
‘O Napule è paruto chiù scetato,
nu poco pucurillo migliorato.
Sperammo buono: sta arrivann’a Lazio!

Clicca qui per vedere il video incorporato.

TORINO-NAPOLI 1-0 (in napoletano)

admin — Sun, 21 Dec 2008 22:15:28 +0000

Se perdette. Ma già steva scritto:
tuttequante ‘o sapevemo buono
c’allà ‘ncoppa turnava sconfitto
pe Natale, stu Napule ccà.

Comm’è streuza, amice, ‘sta vita!
Hamsik e Lavezzi so’ forte,
ma chest’anno, ‘a chiù meglia partita
l’hanno fatta restann’a guardà.
All’inizio, l’azzurre ce stanno:
pe’ mezora, jucamme nuje sule.
Poi perdimm’a misura, calammo,
e alla fine ‘o pigliammo, nu gol.

Quant’è bravo Blerim Dzemàili,
miezu svizzero e miez’albanese!
Ce l’avessema dà, chella s-mail:
“calciatore”, e po’ “punto ittì”.

Loro teneno l’acqua alla gola:
nuje c’a capa già stamm’in vacanza.
Occasione, manc’una; una sola,
e accussì, comm’a vuò pariggià?

“Non tardare, Natale: ora vieni!”
- fanno, allère, ‘e tifuse d’o Toro.-
Oggi Bianchi-Natali-Sereni
sai che festa se fiden’e fa!

Clicca qui per vedere il video incorporato.

NAPOLI-SIENA 2-0 (in napoletano)

admin — Mon, 08 Dec 2008 09:09:06 +0000

Joca, ‘o Siena, in bianco-nero:
comm’a Juve, è bicolore,
e ‘o ribrezzo cchiù sincero
già ce scenne dint’o core.

Stanne mise molto peggio
in classifica, ‘ e senese:
si se piglian’o pareggio
fanno festa pe’ nu mese.
Siena ten’a Buoninsegna
(no Bonimba: ll’ato, Duccio),
e vo fa vedè ch’è degna,
mentr’o Napoli è nu ciuccio:

Maggio pare nu fantasma,
Blasi tira aret’o pere,
Zalayeta è un cataplasma,
e Gargano nun se vere.

Noi teniamo gli spaghetti:
loro solo un Maccarone,
ca s’infizza in spazi stretti,
però ‘a sbaglia, l’occasione.

Ma ccà stamm’a Forerotta,
ca nunn’è Piazza del Campo:
ccà se spanteca, se lotta:
chest’è Napoli! E in un lampo

cagna faccia, sta partita:
cross di Hamsik, trase Maggio.
Giuvinò, nun ve n’ascite,
pure Denis fa dammaggio.

Tornatenne int’a Toscana
cu doje rete, caro Siena!
Niente tiene, dint’e mmane:
semp’a nosta, rest’a scena!