Il Napoli ha due giornali in rima, solo uno in napoletano: ‘Onapule.it » gol napoli

LAZIO-NAPOLI 1-1

admin — Sat, 03 Apr 2010 23:57:28 +0000

Pecchè, doppo cacciato a Ballardini,
se pigliaje Edy Reja, chillu Lotito?
‘O ssanno tuttequante, anche ‘e bambini:
cumm’è, ca sulo tu nun l’e capito?

Pe fà, l’anno che vene, ‘a serie B!
“Visto che a forza ce dovemo annà,
ce pijamo un esperto: questo qui,
così ce cominciamo a preparà…”

Edy, scusa, pe chesta cattiveria:
t’avimma dice sulamente grazie.
Però la situazzione è molto seria:
‘a toja, purtroppo, e chella della Lazio.

E’ na squadra irritabbile e nervosa,
ca specialmente è fraggile in/difesa.
Se al Napule ‘a capeveno, sta cosa,
di sicuro ‘a facevano, l’impresa.

Ma ncopp’o campo, il Napoli non c’era:
si ce steva, pareva assaje distratto.
Già senteva ‘o profumo d’a pastiera:
già vedeva ‘o capretto dint’o piatto.

E ‘o vedettemo tutti, comm’è ghiuta:
doppo ca Marekià signaje ‘o pareggio,
‘a partita, int’a n’attimo, è fernuta,
E va buono: meglio chesto, ca peggio.

Accussì c’a magnammo, sta menesta.
Mò facimmoce Pasca: bona festa!

Clicca qui per vedere il video incorporato.

ATALANTA-NAPOLI 0-2 (in napoletano)

admin — Wed, 06 Jan 2010 18:01:09 +0000

Sarrà tosta? Pe’ forza! E che scuperta:
bergamaschi, leghisti e montanari.
Già ce va buono, si da sta trasferta
c’arretirammo ‘a casa cu nu’ pari.

‘A classifica loro nun l’esalta?
E a nuje manco p’a capa ce ne passa.
‘A città loro è bella, int’a part’alta,
ma Bergamo pe nuje fuje sempe bassa…

E po’ sta n’atu fatto: dopp’e feste
o Napule, ‘o sapimmo ca fa pena.
Mo ci’a pigliammo, na lavat’e testa:
‘a tenimmo int’all’uocchie, chesta scena.

E invece no! L’azzurre vanno in campo
comme si maje si fosseno fermate.
Subito annanze cu na rete lampo
‘e Quagliarella, stanno cuncentrate:

va buono, Hamsik e Maggio fanno poco,
e Lavezzi se vere a intermittenza:
ma cummannammo tutt’o tiempo ‘o gioco,
e doppo segnarrà pure Pazienza.

Grazie pe stu rialo, né Befana!
N’atu bellu capitolo ‘e sta storia
l’amma scrivere a fine settimana.
Sta arrivanno Cassano, c’a Sampdoria!

Clicca qui per vedere il video incorporato.

NAPOLI-LIVORNO 3-1 (in napoletano)

admin — Sun, 30 Aug 2009 21:11:10 +0000

Nunn’è Totonno: è Fabio ‘e Quagliarella.
Chella canzone, ve l’allicurdate?
Nun le fa specie ‘a malasciorta, ‘a jella:
‘o bancariello, ‘on Fabio, ‘o scassa all’ate!

“Che saccio fa? Guardate: mò v’o spiego”.
‘A centrocampo, aiz’o pere, e spara,
facenno (quase…) tale e quale a Diego,
e a chill’atu fenomen’e Mascara.

Ma nunn’avimmo visto niente ancora.
A signà, è na questione de minute:
pirciò, doppo soltanto un quarto d’ora,
statte buono, Livò. Tante salute.

Amaranto, pe vuje se mette male.
Chistu viaggio addu nuje ve costa caro:
cu na splendida azione personale
‘a signato ‘o siconno, Marekiaro.

C’abbracciammo, abballammo: amice, è fatta,
tenimm’ o risultato in casciaforta.
Ma no; ammo miso ‘o pepe ‘ncul’a jatta;
‘o Livorno se sceta, e ‘a mette in porta.

Guagliò, tenite ‘o carro ncopp’a scesa,
o perdimmo tre punte già sicure;
comm’a sempe, traballa la difesa,
s’è fatto notte, e tornano ‘e paure.

Comm’è fernuta? Già ‘o sapite, comme:
c’ha salvato la nostra buona stella,
na stàr, cu nu nomme e nu cognomme:
semp’isso, il nostro Fabio Quagliarella!

Clicca qui per vedere il video incorporato.

SIENA-NAPOLI 2-1 (IN NAPOLETANO)

admin — Sun, 03 May 2009 20:28:08 +0000

Tenimm’a pizza,
e vuje tenite ‘a piazza
del Campo: nu bisciù,
bella e perfetta.
Nuje tenimme ‘a Torretta,
voi la Torre del Mangia:
ognuno ‘ e nuje s’arrangia
cu chello ca ce stà.
E ‘o Napule,
nunn’è na nuvità,
attualmente nun tene
‘o rest’e niente.
Quann’o guarde, te vene
’o male ‘e core:
se, sul campo, il migliore
insieme a Montervino
fuje Pià,
ebbene, una ragione
c’adda stà…
Sta storia adda fernì,
p’ammore ‘e Dio.
Stammatina, perciò
vac’a truvà
‘o direttore
d’o giurnale mio,
e ‘o dico: “Direttò,
pienzece tu:
io questi versi
nunn’e scrivo chiù.
Si – pe’ cuntratto –
continuare devo,
vabbuò: ma famme scrive
‘ncopp’o Chievo!”
‘E chesto, amici miei,
teng’o gulìo.
Purtroppo, ‘o direttore
sono io…

Clicca qui per vedere il video incorporato.

NAPOLI-UDINESE 2-2 (IN NAPOLETANO)

admin — Sat, 31 Jan 2009 20:30:31 +0000

D’o sole, già si sa, chist’è ‘o paese:
Napoli, cielo blu e lenzola stese.
Sta squadra c’ha abituato a grann’imprese,
ma nun vencimme chiù: sarrà nu mese.
E a nuje c’esauriscieno, ll’attese.
Stasera scenne in campo l’Udinese:
vinte minute, e già l’avimme stese.
Doje rete, e l’aizammo, ‘o gran pavese!
Po’ l’azzurre però se ne so scese:
Cannavaro fa fallo sul ghanese
Asamoah, e accussì pavamm’e spese.
Po’ Quagliarella (‘e nascita, stabiese…)
se dimostra scorbutico e scortese.
Vencere ‘na partita? I che pretese!

Clicca qui per vedere il video incorporato.

CHIEVO-NAPOLI 2-1 (in napoletano)

admin — Sun, 18 Jan 2009 19:45:16 +0000

‘A partita contr’o Chievo
incertezze nunn’e deva:
sti tre punte, chi c’e lleva?
‘O maestro cu l’allievo:
sarrà comm’a nu prelievo…
Ma ‘o tifoso è ghiuto ‘n freva:
na partita accussì greve
cumpariè, nun se vereva
fin dal basso Medioevo.
Cu Gargano ca sbariava,
e Hamsìk ca s’addurmeva:
Reja, oinì, ma quann’o llieve?
Quann’ l’arbitro ‘o cacciava,
‘o tifoso respirava:
u Maronna, e che sollievo!
‘O rigore nun ce steva:
ma abbuscà contr’a stu Chievo
maje nisciuno s’o credeva.
Ncopp’e maglie avita scrive
Lete, no: “LOTE”, in rilievo!

Clicca qui per vedere il video incorporato.