Il Napoli ha due giornali in rima, solo uno in napoletano: ‘Onapule.it » calcio

PALERMO-NAPOLI 2-1 (in napoletano)

admin — Sun, 23 Aug 2009 21:00:08 +0000

Maggio, ‘e cose ca fai nun so’ normali.
Pigliaste, ‘o primmo tempo, ben tre pali:
doje – belli! – dint’a porta d’o Palermo,
e ‘o terzo, quanno si’ rimasto fermo
annanz’a porta nosta, ‘mbambulato:
è arrivato Cavani, e t’ha strunzeato.
Chiù tarde, a tre minute d’o pareggio,
nu’ cumpagniello tuo facette peggio.
Zunì, bell’e papà, facce ‘o favore:
l’eva fà proprio, ‘o fallo da rigore??
Doje fesserie, doje gol. E jammo in freva.
Nu Napule accussì nun se vedeva
d’o novembre passato: ‘a nove mise.
‘O Palermo è crollato: è ghiuto ‘ncrise,
c’è legni, pe tre vote s’è salvato:
po’ s’è trovato in mano ‘o risultato.
Si pigliave ‘o pareggio, Zenga mio,
aviva vasà ‘nterra, t’o dic’io.
E invece…cu stu mafaro scassato
forse hai ragione: ‘o vinci, ‘o campionato!
Na sconfitta accussì, fa mal’o core.
Tra chesti curtellate, ed il calore
‘e n’estate vullente, amici belli,
fernimme tutte ‘ncopp’e Cardarelli!

Clicca qui per vedere il video incorporato.

CAGLIARI-NAPOLI 2-0 (in napoletano)

admin — Sun, 19 Apr 2009 20:00:06 +0000

Segna subbeto, ‘o Cagliari: in partenza.
Nun dammo retta: amma tenè pazienza,
e chillo nuje – purtroppo! – ce l’avimmo.
No, Donadoni: ancora nun ce simmo.
‘O Napule è nu ciuccio, e trotterella:
vulà vulesse, ma le manca ‘a scella.
Pe furtuna, int’a porta, cu sti ciucci
ogge ce sta piazzato Luca Bucci,
ca pure si lle vene nu catarro
è sempe molto meglio di Navarro.
Lavezzi e Blasi nun fanno pertuse:
l’isolane discendono, furiuse.
Cercan’e raddoppià, però nun ponno:
c’è Santacroce, all’urdemo siconno.
Int’a ripresa ‘o Napule è chiù sveglio,
e ‘a palla gira un pucurillo meglio.
Stamme pe’ pariggià? Nun ce se crede:
Lazzari ce castiga in contropiede
Sii chiaro, Marekià: nun vuò restà?
dillo, e accussì te venne, ‘a società.
Chesti toje prestazione, i’ nun m’e spieco:
nun sì slovacco, tu sì zuoppo e c(i)eco!

Clicca qui per vedere il video incorporato.

NAPOLI-MILAN 0-0 (IN NAPOLETANO)

admin — Sun, 22 Mar 2009 21:00:36 +0000

Sentit’ a me: tenete dei bambini?
Portatel’al San Paolo, per vedere
nu granne giocatore: stu Mannini,
ca nunn’a maje tirato areto ‘o pere.

‘A partita accummencia propio male:
nunn’a fanno girà, l’azzurre, ‘a palla.
Zalayeta, iss’o ffà: però al plurale.
Ogne cosa ca tocca, piglia, e ‘a sballa.

Guagliò, simme sincere, chist’è ‘o fatto:
se al posto ‘e chella ualler’e pantera
ce steva, che ve pozzo dì: nu gatto,
se venceva, c’o Milan, ll’ata sera.

Quale uruguagio: chist’è ‘n’uruguaio!
Ma ‘o ciuccio sta in salute: scalcia e raglia,
corre, riparte, nun s’arrenne maje,
e – almeno ai punti – ‘a vence, la battaglia.

Né, propi’a nuje ce l’anno fatto, ‘o pacco.
Quanno fuje? Nu momento, ca v’o spieco:
dint’a porta ‘a mettette lo slovacco,
ma sbandieraje nu guardalinee c(i)eco.

Int’a ripresa, assalti all’arma bianca:
se giarnia, ‘o Milan, chieno de campioni.
‘A squadra sta in gran forma, nunn’è stanca:
ma in questo che c’azzecca, Donadoni?

In poche juorne, già simme brillante?
Ma che: fuje na congiura di palazzo.
L’amme sempe sapute tutte quante:
povero Reja, fuje tutto n’intrallazzo!

Clicca qui per vedere il video incorporato.

Napoli-Lazio 0-2 (in napoletano)

admin — Sun, 08 Mar 2009 21:00:33 +0000

Risultato finale: doje a zero,
ma a brocchi, ammo venciuto doje a uno.
Né, ncuoll’a Rocchi nun ce stà nisciuno?
Gnernò: e ‘a Lazio nun le pare overo.

Jamme sotto, e la squadra è ghiuta in crise.
Ma a piglià chistu gol, è nu peccato:
fino a quel punto, avevemo jucato
‘a partita migliore ‘e sti doje mise.

Po’ tutt’assieme, arriva stu rialo.
Quann ’o pallone ‘e Foggia arriva a Rocchi,
San Tommaso po’ credere ai suoi occhi,
e ‘a votta in porta. Doppo ven’o calo.

‘E sische, infine, fioccano impietose
pe tutti: nun rispettano a nisciuno.
Ma pavajemo l’errore di qualcuno:
che canchero capisceno, ‘e tifose??

Clicca qui per vedere il video incorporato.

JUVENTUS-NAPOLI 1-0 (IN NAPOLETANO)

admin — Sat, 28 Feb 2009 21:10:00 +0000

Dicimmuncelle chiare, assera assera:
qualcuno se puteva immagginà,
jamme, ca c’a putevema jucà:
ca se venceva contr’e bianconere?

Nuje no, nun ce l’avimme maje sunnato,
pecchè ‘e tenimme chiare int’a memoria
‘e fatte ca so’ scritte dint’a storia:
nuje cà perdimme sempe. E’ nu peccato,

pecchè na Juve tanto inconcludente,
senza Camoranesi e Sissoko
cu’ Trezeguet chiù fermo ‘e nu cummò,
nunn’è c’a ritrovammo facilmente.

‘A nosta fuje na gara dignitosa:
pure nu par’e guizzi, e quacche sprazzo.
A tirà, chesto no: manco p’o ….,
(‘a squadra dell’andata è n’ata cosa),

ma per lo meno, jà, nun fuje nu strazio.
‘O Napule è paruto chiù scetato,
nu poco pucurillo migliorato.
Sperammo buono: sta arrivann’a Lazio!

Clicca qui per vedere il video incorporato.

Napoli-Genoa 0-1 (in napoletano)

admin — Sun, 22 Feb 2009 19:40:23 +0000

Ma c’o facimmo a fà, stu madrigale,
pe na squdra ca tene ‘a gamba corta,
ca joca, ‘a chiù ‘e nu mese, accussì male!

Fosseme jute annanze ati sei ore,
maje l’avessema mise dint’a porta:
fosseno sempe lloro, ‘e vincitore.

Chiagnimme. Chesta fuje l’urdema botta
‘e stu cacchio ‘e girone di ritorno:
oi Napule, è fernuta Piererotta!
mò scura notte, s’è stutato ‘o juorno.

Clicca qui per vedere il video incorporato.

Napoli-Bologna 1-1 (in napoletano)

admin — Sat, 14 Feb 2009 21:05:45 +0000

Ajere l’Udinese, oggi il Bologna:
chiunque arriva cà, pigli’o pareggio.
Tutt’è cagnato, e chesta è na vergogna:
ogne partita andiamo un punto peggio.

E mò stammo ch’e quatto rote ‘nterra,
l’uocchie sbarrate, fisse dint’o vvuoto:
ce stanno chi l’ha ruvinate ‘a guerra,
ma a nuje c’ha ruvinato l’Intertoto.

Ma forse è meglio a dì: l’Inter-Totò.
‘E difensore c’hanno arricordato
chelli comiche vecchie di Sciarlò,
e di Totò: che spasso, e che risate!

Dicette na scrittrice fina fina:
quest’oggi “Il Marek Napoli non bagna”.
Senz’ isso, ‘o centrocampo è na latrina,
è nu guaio, nu debbito, na lagna.

Gargano fa un passaggio, e doje ne sbaglia,
Denis sta a vinte metre dalla porta.
‘O tifose esce pazzo, pe’ sta maglia,
però nun c’ha fa chiù: nun ve supporta.

‘E tiempe ‘e Bernardini, il grande Fuffo:
“Il Bologna tremare il mondo fa”.
Ma chesto tanne. I’ ve pigliasse a buffe,
tremmate pur’annanze a chesti cà??

E adesso? Mò dobbiamo dare avanti,
a bott’e forza: quel ch’è stato è stato.
Però su questo nun ce stanno santi:
doje punte perze? Un punto guadagnato!

Clicca qui per vedere il video incorporato.

PALERMO-NAPOLI 2-1 (in napoletano)

admin — Sun, 08 Feb 2009 21:30:31 +0000

Né, Patatè: ma che t’avimmo fatto?
E’ comm’a nu peccato originale:
ogne vota, a giucà cu st’animale,
amma pavà nu pizzo: nu riscatto.

Sulo accussì me pozzo fa capace:
‘a Juventus, ormai distrutta e stanca,
ca steva p’aizà bannera janca,
c’o mette a quel servizio. E andate in pace.

Suffrette ‘o pate, e mò soffren’e figli.
So sissant’anne ca pavamm’o prezzo.
Patatè, tu ‘e prutiegge, a stì munnezze:
te dice ‘e Messe, né, Cobolli Gigli??

Gargano ‘a spara ‘ncielo, ed è la fine.
Di nuovo perd’o Bene, e vence ‘o Male.
Vabbuò, ci andate voi, in semifinale:
ma ne facite tutte medicine!

Screvimmo dalla curva d’o Barbera
(‘o stadio è dedicato a Sconsolata?)
Sperammo ch’è passata, la nuttata:
ce serve la vittoria, cà, stasera.

Assettato in tribuna, Zamparini,
‘o presidente magna-allenatori.
Pe’ chi perde, a Palermo, so dolori.
Pe mò te sì salvato, Ballardini,

però cu chillu là nun se sa maje.
Si ‘a riuscessem’a vencere, ‘a partita
ncopp’a stu campo (l’ex Favorita)
te mettessem dint’a certi guaje…

Nun se puteva accummencià chiù peggio.
Aronica s’addorme cu Migliaccio
(comm’ha signato, ancora nunn’o saccio):
loro corrono, nuje iamm’a passeggio.

Miccoli va sguscianne ‘a tutt’e parte
comm’a na saponetta, o un dentifricio:
mette na palla al centro pe’ Simplicio,
ed è gol. Doje a zero, se riparte.

Guagliò, c’amma scetà immediatamente,
e la cosa riguarda a tuttequante.
Denis è svelto comm’a n’elefante,
e pur’o Pocho nun combina niente.

Fa un grande gol, ‘o nuosto Marekiaro,
che al finale del tempo, a noi c’illude.
Ma nel siconno niente se conclude,
e chest’è stato n’atu juorno amaro.

P’a soluzione, amma aspettà domani,
cu l’argentino ca c’ann accattato:
“Datolo” è l’anagramma di “lodato”,
ma nun ve pare uno d’e sette nani?

Clicca qui per vedere il video incorporato.

NAPOLI-UDINESE 2-2 (IN NAPOLETANO)

admin — Sat, 31 Jan 2009 20:30:31 +0000

D’o sole, già si sa, chist’è ‘o paese:
Napoli, cielo blu e lenzola stese.
Sta squadra c’ha abituato a grann’imprese,
ma nun vencimme chiù: sarrà nu mese.
E a nuje c’esauriscieno, ll’attese.
Stasera scenne in campo l’Udinese:
vinte minute, e già l’avimme stese.
Doje rete, e l’aizammo, ‘o gran pavese!
Po’ l’azzurre però se ne so scese:
Cannavaro fa fallo sul ghanese
Asamoah, e accussì pavamm’e spese.
Po’ Quagliarella (‘e nascita, stabiese…)
se dimostra scorbutico e scortese.
Vencere ‘na partita? I che pretese!

Clicca qui per vedere il video incorporato.