Il Napoli ha due giornali in rima, solo uno in napoletano: ‘Onapule.it » Poesie in napoletano 2009-2010

SAMPDORIA-NAPOLI 1-0

admin — Sun, 16 May 2010 18:30:19 +0000

Già se sapeva: steva tutto scritto.
Quanno so’ scarse li motivazzione,
pure si tiene a unnece campione
‘a copp’o campo sempe jesce scunfitto.

‘A Samp l’adda piglià, stu quarto posto:
nuje, si perdimmo, nun c’importa niente.
‘A cosa, ‘o vvide, è molto differente;
‘e sta tranquillità pavammo ‘o costo.

Nunn’è ca s’aizaje bannera janca:
però nuun’era ‘a gara della vita.
C’a jucaimo ‘o stesso, la partita,
però c’a panza chiena, e ‘o cunto in banca.

Aurè: te l’e guardato a stu Pazzini?
Mò nun dicere: cheste so’ pretese.
Nun vulimm’ o fenomeno barese,
ma ‘o centrattacco sì! (Pur’a Mannini…)

E se n’è ghiuta pure sta staggione.
Cu Mazzarri, l’azzurre, frische e toste,
remmanetteno sempe ‘e primme poste:
e ce ne detteno, ‘e suddisfazzione.

‘E gioie chiù importante; ‘e chiù sincere?
Pure si assummigliante, comme mossa,
a tirà scuppettate ‘a Croce Rossa:
battere pe doje vote ‘e bianconere!

Vabbuò, nu’ ghiammo in Coppa dei Campioni:
però – dalla classifica se vere –
cosa ca raramente ce succere,
stamme primma d’e muorte ‘e Zaccheroni!

Nun c’a facette, a Roma. E li penzieri
(‘e ‘mbruoglie, ‘e premie a vencere c’o Siena:
chi crere a chesti ccose, me fa pena),
so’ differente a chille ch’eran-ieri.

Cumplimente, Moratti, pe’ stu bis:
doppo la Coppa Italia, e lo scudetto,
na cosa sulamente ‘a te m’aspetto:
ca sabbato, a Madrid, faje pur’ ‘o tris!

Clicca qui per vedere il video incorporato.

NAPOLI-ATALANTA 2-0

admin — Sun, 09 May 2010 19:02:02 +0000

‘E fatica ce n’è voluta tanta:
difficile a chiegà chest’Atalanta,
ca corre: nunn’è certo n’Ata/lenta,
in specie cu’ Valdez, e cu’ Guarente.
Ma ‘o Napule ogge tene nu tridente:
e ‘a ponta chiù appuntuta, pare chella
ca currisponne a Fabio Quagliarella.
Vencimmo: e fin’a ccà, tutto normale.
Ma succere coccosa di speciale:
‘o Parma, ca c’aveva castigato,
ha ripetuto ‘ o stesso risultato
vattenno la Juventus in trasferta.
‘A porta dell’Europa nunn’è aperta:
è spalancata. E scoppia l’esultanza:
l’azzurre hanno salvato la vacanza!

Clicca qui per vedere il video incorporato.

NAPOLI-CAGLIARI 0-0

admin — Sun, 25 Apr 2010 20:32:20 +0000

Nun ce se po’ passà, pare incredibbile:
quanno jucammo contr’e squadre sdrucciole,
comm’a nuje: cu l’accento comm’ a “Nàpule”,
c’ammeretassemo na faccia ‘e pacchere.
E’ strano: comme fosse un fatto maggico,
cu lloro nun vencimmo: e chest’è traggico.
E nunn’è ca so’ squadre irresistibbili:
song’o Mòdena, ‘o Màntova, e po’ l’Empoli.
Chest’anno grazie ‘o cielo, ‘e squadre sdrucciole
so sulamente doje: Gènoa e Càgliari.
Comm’è ghiuta? La cosa è immagginabbile:
tre pareggi, e na scoppola impensabbile.
Ogge, cu chille scise a copp’all’isola,
a ‘o Napule venette na paralise:
pecchè? Chi ‘o ssape: s’adda fa l’analise…
‘O Palermo sta in orbita, è imprendibbile:
acchiappà ‘a Sampdoria, è impraticabbile.
‘A Juve? Tutti alluccano: “E’ inguardabbile!”,
ma mò c’ha superato (in pianta stabbile…?)
Forse, a restà addo stammo, è chiù possibbile:
chistu settimo posto, è difendibbile?

Clicca qui per vedere il video incorporato.

BARI-NAPOLI 1-2

admin — Sun, 18 Apr 2010 19:33:30 +0000

Mo ca nun tene chiù motivazione,
‘o Bari scende in campo scoglionato.
Se vuleva salvà: già s’è salvato,
pirciò corricchia areto a stu pallone:

a se fa ‘o mazzo tanto, che l’importa?
Pe chesto, chi è trasuto al San Nicola
in campo ce truvaje na squadra sola:
‘o Bari ha fatto sulo un tiro in porta.

E nuje? Nunn’ è c’avimmo entusiasmato:
abbiamo fatto una partita onesta,
ca però c’è abbastata pe’ fa festa,
e pe’ ce purtà ‘a casa ‘o risultato.

A jucà buono sono stati in tanti:
salutammo ‘o ritorno ‘e Santacroce,
e poì gridammo in coro, a piena voce:
si tu, Lavezzi, ‘o nuosto centravanti!

Clicca qui per vedere il video incorporato.

NAPOLI-PARMA 2-3

admin — Sat, 10 Apr 2010 22:40:40 +0000

Henri Beyle (ma chiammalo Stendhal)
steva a Milano a Pasca, ed a Natal,
e ‘o Mìlan le piaceva, è propio overo.
Sta scritto int’o romanzo “Il rosso e il nero”.

“Ma ‘o Parma – isso diceva - è n’ata cosa!”
‘E chesto, ‘a storia è certa: anzi, è Certosa.
Mo però basta, c’a letteratura:
stu Napoli sconcerta, fa paura.

Sì bravo, si sta cosa l’e capita:
cumm’è c’avimmo perso la partita?
Na squadra primma rapida, scetata,
tutt’assieme, ‘a ripresa, s’è fermata.

‘O Napule curreva, e mo cammina:
p’a bacchetta d’a Fata Smemorina
Cenerentola è n’ata vota chella:
ato ca principessa, è n’orfanella.

E Cannavaro e Grava, poverini,
‘a cavalle, di nuovo topolini…
Spiegatece che cocchio v’è successo:
mezanotte è sunata propio adesso??

‘E mettimmole, chesti carte in tavola:
‘o quarto posto era na bella favola,
e si pensammo a ajere, è manifesto,
ca so’ favole pure ‘o quinto, e ‘o sesto!

Clicca qui per vedere il video incorporato.

LAZIO-NAPOLI 1-1

admin — Sat, 03 Apr 2010 23:57:28 +0000

Pecchè, doppo cacciato a Ballardini,
se pigliaje Edy Reja, chillu Lotito?
‘O ssanno tuttequante, anche ‘e bambini:
cumm’è, ca sulo tu nun l’e capito?

Pe fà, l’anno che vene, ‘a serie B!
“Visto che a forza ce dovemo annà,
ce pijamo un esperto: questo qui,
così ce cominciamo a preparà…”

Edy, scusa, pe chesta cattiveria:
t’avimma dice sulamente grazie.
Però la situazzione è molto seria:
‘a toja, purtroppo, e chella della Lazio.

E’ na squadra irritabbile e nervosa,
ca specialmente è fraggile in/difesa.
Se al Napule ‘a capeveno, sta cosa,
di sicuro ‘a facevano, l’impresa.

Ma ncopp’o campo, il Napoli non c’era:
si ce steva, pareva assaje distratto.
Già senteva ‘o profumo d’a pastiera:
già vedeva ‘o capretto dint’o piatto.

E ‘o vedettemo tutti, comm’è ghiuta:
doppo ca Marekià signaje ‘o pareggio,
‘a partita, int’a n’attimo, è fernuta,
E va buono: meglio chesto, ca peggio.

Accussì c’a magnammo, sta menesta.
Mò facimmoce Pasca: bona festa!

Clicca qui per vedere il video incorporato.

NAPOLI-CATANIA 1-0

admin — Sun, 28 Mar 2010 18:26:36 +0000

Ch’e frate Fabio e Paolo Cannavaro
‘o destino nun fuje di certo avaro.
A tutt’e doje facette bei regali,
ma nunn’e dividette in parti uguali.
Fabio, chiù curtulillo e chiù scattante,
suddisfazione ce n’a avute tante:
capitano nell’ultimo Mondiale,
‘o chiù presente della Nazionale,
facette – tanno – il suo capolavoro
vencenno pure nu’Pallone d’oro.
Paolo accussì importante nunn’è stato:
in Nazionale nunn’a maje jucato,
e pure si s’è sempe fatto ‘o mazzo,
in carriera nunn’a vinciuto un ….
Chiù àvuto, e chiù gruosso d’o fratello,
però meno aggrazziato: meno bello,
pareva, ‘a piccerillo, destinato
a fa ‘a parte d’o frate sfurtunato.
‘O dicevano tutti, all’occasione:
“Chist’è ‘o fratello scarso d’o campione!”
L’anno scorso esplodette ‘o malcontento:
“Tene ‘e piere ‘e lignamme, è scemo, è lento!”
Paolo s’abbatte: “E mò che pozzo fa?”
Sta quase pe’ decidere ‘e lassà,
ma na voce le dice: “Dai, resisti!”
E adesso so’ luntani i giorni tristi:
int’a difesa, ognuno ‘o po’ vedè,
‘a cummanna isso: è un principe, nu rre.
Con il Catania, Paolo Cannavaro
spingennose int’all’area, da corsaro
fa ‘a primma rete azzurra in serie A.
Paolo, ccà, pe te: tre vote urrà!

Clicca qui per vedere il video incorporato.

NAPOLI-JUVENTUS 3-1

admin — Thu, 25 Mar 2010 23:45:09 +0000

‘O pallone, se sape, è sulo chesto:
“ ‘a malatìa”. La caccia ad un “bel gesto”.
Chiellini, andato in gol pe’ distrazione
d’e nuoste, esulta comm’a nu scignone,
scazzottannose ‘o pietto cu li mmane.
Ma tu si’ n’ommo, o si’ n’urangutan?
Po’ vene pure ‘o gesto ‘e Marekiaro.
Sbaglia ‘o rigore (fatto quase raro),
ma doppo fa nu granne gol ‘e testa.
Currenno miez’o campo pe fà festa
ch’e mane, se pulezza tutt’a maglia
( “vavattenne malocchio, e chi m’o scaglia!”)
A n’atu ppoco, segna Quagliarella,
e ccà accummencia n’ata tarantella:
se va tuglienno ‘a povere d’e spalle
(“Né critici, levateve d’e …..”):
e po’ c’a mano, mima ‘o “quaquaqua”
(“Site buone sultanto a criticà…”)
Jucatore, mò basta. Nun ve tocca
a parlare c’e mmane, e cu la vocca.
Da adesso in poi, facitece ‘o piacere:
ogne cosa, dicitela ch’e piere!

Clicca qui per vedere il video incorporato.

MILAN-NAPOLI 1-1

admin — Sun, 21 Mar 2010 19:40:47 +0000

‘A dimanna sta dint’a capa mia:
ma nun tengo ‘a risposta, e stongo triste.
Manca, sta storia, dint’ a agiografia:
san Siro, era interista, o milanista?

Sapite buono comme song’e sante:
‘a tantu tiempo stanno ‘n Paraviso,
pirciò so’ tropp’antiche, so’ scucciante.
Si siente a loro, tutto va diviso…

Però, maje che l’avessero spiegato
ca si tutto se sparte, un po’ per uno,
ma c’o facimmo a fa, stu campionato,
si alla fine non vence chiù nisciuno??

Tutta sta storia tene un punto fermo,
ca nun ce fa durmì, fino d’aieri.
L’Inter pigliaje nu punto, giù a Palermo:
tre ne ponno piglià, ‘sti rossoneri.

‘O sorpasso? Gnorsì: però eventuale.
Meglio ca rimandate ball’e cant:
certi vvote se fa, ma vene male
(ve ricurdate ‘o film cu Trintignant?)

‘O Napule, all’inizio, joca buono:
ce pare chillo ‘e quatte mise fa.
Pocho, si ‘o lampo, ma sì pure’o tuono!
Jammo in vantaggio. Che succedarrà?

Chiù ‘e na vota c’andiamo assai vicine,
però nun ce riuscimmo, ‘a fà ‘o secondo.
E allora- ‘o sanno tutti: anche ‘e bambine –
quanno nun signe, da che mondo è mondo

al finale, è sicuro che la paghi.
Nun l’e manco fernuto d’o penzà
ca segna chell’isterico di Inzaghi.
E Ronaldinho!, nun se po’ marcà:

quanno scenne, accummencian ‘e turmiente.
Int’a ripresa, ‘o Napule fa peggio,
e arretra: ma resiste, stregne ‘e riente,
e comme si s’o mmerita, ‘o pareggio!

( Leggi versione in Italiano )

Clicca qui per vedere il video incorporato.

NAPOLI-FIORENTINA 1-3

admin — Sat, 13 Mar 2010 23:58:57 +0000

Sta serata è nu vico ca nu sponta:
fa friddo, e ncopp’o campo vott’o viento.
Si ‘o Napule ha perduto: si s’è spento
è pecchè nun tenimmo ‘a primma ponta.

‘A verità, fuje amara, ‘a medicina.
Sta scunfitta ce coglie all’intrasatto:
nun se perdeva d’ò duimilequatto,
e po’ è venuta chesta Fiorentina.

‘A squadra loro è forte chiù d’a nosta,
pecchè teneno ‘o bomber: ‘o cecchino.
E s’è visto: se chiamma Gilardino,
e a nuttata fuje nera comm’a gnosta.

A un certo punto stevemo in vantaggio,
po’ c’hanno tolto un calcio di rigore.
Ma quann’a scusa è bona, pe’ favore,
è meglio can nun s’usa, dice ‘o saggio.

I’ mo v’o dico, ‘o fatto comm’è ghiuto:
è stata na questione ‘e malasciorta.
Ogne cosa, stasera, è andata storta;
sulamente pe chesto s’è perduto.

All’inizio è tranquillo, ‘o Presidente,
ma po’ s’agita, e parla dell’America:
le sta quase a venì na crisi isterica.
Calmate, Aurè, nunn’è succieso niente!

Clicca qui per vedere il video incorporato.