Il Napoli ha due giornali in rima, solo uno in napoletano: ‘Onapule.it » Poesie in napoletano 2008-2009

NAPOLI-LIVORNO 3-1 (in napoletano)

admin — Sun, 30 Aug 2009 21:11:10 +0000

Nunn’è Totonno: è Fabio ‘e Quagliarella.
Chella canzone, ve l’allicurdate?
Nun le fa specie ‘a malasciorta, ‘a jella:
‘o bancariello, ‘on Fabio, ‘o scassa all’ate!

“Che saccio fa? Guardate: mò v’o spiego”.
‘A centrocampo, aiz’o pere, e spara,
facenno (quase…) tale e quale a Diego,
e a chill’atu fenomen’e Mascara.

Ma nunn’avimmo visto niente ancora.
A signà, è na questione de minute:
pirciò, doppo soltanto un quarto d’ora,
statte buono, Livò. Tante salute.

Amaranto, pe vuje se mette male.
Chistu viaggio addu nuje ve costa caro:
cu na splendida azione personale
‘a signato ‘o siconno, Marekiaro.

C’abbracciammo, abballammo: amice, è fatta,
tenimm’ o risultato in casciaforta.
Ma no; ammo miso ‘o pepe ‘ncul’a jatta;
‘o Livorno se sceta, e ‘a mette in porta.

Guagliò, tenite ‘o carro ncopp’a scesa,
o perdimmo tre punte già sicure;
comm’a sempe, traballa la difesa,
s’è fatto notte, e tornano ‘e paure.

Comm’è fernuta? Già ‘o sapite, comme:
c’ha salvato la nostra buona stella,
na stàr, cu nu nomme e nu cognomme:
semp’isso, il nostro Fabio Quagliarella!

Clicca qui per vedere il video incorporato.

NAPOLI-CHIEVO 3-0 (IN NAPOLETANO)

admin — Sun, 31 May 2009 20:15:44 +0000

Ce pienze? S’arravoglian’e stentine:
se ne va Figo, se ne va Maldini,
se ne va ‘o biondo, Nedved, ‘o ceco.
E’ nu mumento tragico, nu spreco.
Se ne va – l’equilibri si so’ rotti -
n’atu pezzo d’o Milan: Ancelotti.
Tifoso bello, l’e capito tu
ca chisti ccà nunn’e vedimmo chiù?
E se n’è ghiuto pur’o campionato:
pe grazi’e Dio, putimmo tir’o ciato.
Basta, ch’ e flebo ‘e disintossicante:
pe’ sei mise, n’avimmo fatte tante!
Meno male: è fernuto ‘o tormentone.
Ncopp’o stadio ce steva nu striscione:
“Reja, di una stagione deprimente
tu sei rimasto l’unico vincente”.
E’ triste, ma purtroppo è proprio overo,
e nuje ‘o sottoscrivimmo per intero.
Ce stà ‘o Chievo ‘ e Di Carlo, quasi calvo:
sta tranquillo, a qualcuno piace salvo.
Na partita fra amice, int’e ciardine:
ce stanno chilli doje, Pinzi-Contini.
Vinte minute, e già so’ chiusi i giochi:
per il Pocho al San Paolo siamo in pochi,
ma facimmo tre gol, davvero tante:
signammo sulo si nunn’è importante!
Quatto minute, e scenne Montervino,
ca segna. Po’ ce penza Bogliacino.
Fa gol pure Pià, aiza ’e braccia,
e po’ se passa ‘e mane ncopp’a faccia.
Lavezzi vò signà, e ‘o tenta, o scatto:
all’inizio, se vere, è un po’…contratto,
piglia sische, ma pure battimane.
(rimane dint’o Napule, dimane?)
E’ accussì, ca s’è chiuso ‘o campionato.
Chi ha avuto, ha avuto: embè, chi ha dato, ha dato.
‘E giucatore mo’ vann’in vacanza,
e starranno ch’e mane ncopp’a panza.
Repusateve, sì. Sudaste troppo:
tanto ‘e cunte cu vuje, ‘e facimme doppo!

Clicca qui per vedere il video incorporato.

NAPOLI-TORINO 1-2 (IN NAPOLETANO)

admin — Sun, 17 May 2009 20:15:41 +0000

‘A storia, amici miei, nun cagna maje:
primma ‘o tifoso apprezza, e po’ disprezza.
All’inizio: sì granne, granne assaje,
e alla fine: sì proprio ‘na munnezza.

Quinti o sesti, a dicembre, int’all’andata,
ultimi, nel girone di ritorno.
Sta squadra è nu boccaccio ‘e marmellata,
ca s’è squagliata, juorno doppo juorno.

C’o Torino, però, nun giucaje peggio
d’ati vvote (ma l’e capite, tu?)
L’azzurre ‘o meritavano, o pareggio,
e forse pure quaccheccosa ‘e chiù.

Tifoso, tu ‘a memoria ‘a tiene corta:
pe’ te, tutto fernesce int’a scurdata.
Perciò nun t’e ricorde, ‘e tiri in porta,
e qualche bella azione manovrata.

‘O sapimmo: ‘o tifoso equilibrato
è n’ossimoro, o n’araba fenice.
Chello però ca c’ha meravigliato
è leggere – e sentì – chello ca dice

‘a stampa: che infierisce, e spara a zero
su tutti: giucatore e società,
e pure Donadoni, o fanno nero.
Colleghi belli, accussì nun se fa!

‘A tantu tiempo, sì, stammo alla frutta,
e mò nun ce sta chiù nemmeno chella:
ora però ce serve ‘a mano ‘e tutte
p’o fa guarì, stu ciuccio di Fichella!

Clicca qui per vedere il video incorporato.

LECCE-NAPOLI 1-1 (IN NAPOLETANO)

admin — Sun, 10 May 2009 20:40:05 +0000

Lecce: scrive “barocco”, e liegge “brocco”:
chesto succede, si ce lieve l’ ”a”.
Mò pe’ stu Lecce nun ce sta chiù sbocco:
‘a primma serie l’adda salutà.

Nun se po’ dì ch’è stata ‘a malaciorta:
sta squadra nunn’o tira areto, il piede,
ma certi vvote la coperta è corta:
si attacche, doppo rischi il contropiede.

Datolo, l’argentino ossigenato
scenne, e ncopp’a sinistra dà a Pià,
ca stà isso sulo, e sblocca ‘o risultato:
nunn’o puteva propeto sbaglià!

‘O Lecce, giallorosso, vede rosso,
e pe’ ce ripiglià, ce mette ‘o core.
Mannini zompa, e ‘a palla ‘o sbatte addosso:
pe l’arbitro (stu chiaveco!) è rigore.

Dint’a ripresa, tira tutt’e frecce
‘a squadr’e casa: fosseno pesante
tre punte – si ‘e pigliasse – pe’ stu Lecce:
vers’a salvezza, un grosso passo avante.

Nu’ passo ca nun fa chillo, Navarro,
ca (forse) para dopp’a linea janca:
steva propio pe’ cumbinà nu ‘nzarro…
Al finale la squadra pare stanca,

nun c’a fa chiù. Sta quasi per crollare,
ma ‘a traversa protegge ‘o risultato.
‘A salvajemo, ‘a faccia, al Via del Mare.
Né: ma quanno fernesce, ‘o campionato?

Clicca qui per vedere il video incorporato.

SIENA-NAPOLI 2-1 (IN NAPOLETANO)

admin — Sun, 03 May 2009 20:28:08 +0000

Tenimm’a pizza,
e vuje tenite ‘a piazza
del Campo: nu bisciù,
bella e perfetta.
Nuje tenimme ‘a Torretta,
voi la Torre del Mangia:
ognuno ‘ e nuje s’arrangia
cu chello ca ce stà.
E ‘o Napule,
nunn’è na nuvità,
attualmente nun tene
‘o rest’e niente.
Quann’o guarde, te vene
’o male ‘e core:
se, sul campo, il migliore
insieme a Montervino
fuje Pià,
ebbene, una ragione
c’adda stà…
Sta storia adda fernì,
p’ammore ‘e Dio.
Stammatina, perciò
vac’a truvà
‘o direttore
d’o giurnale mio,
e ‘o dico: “Direttò,
pienzece tu:
io questi versi
nunn’e scrivo chiù.
Si – pe’ cuntratto –
continuare devo,
vabbuò: ma famme scrive
‘ncopp’o Chievo!”
‘E chesto, amici miei,
teng’o gulìo.
Purtroppo, ‘o direttore
sono io…

Clicca qui per vedere il video incorporato.

Napoli-Inter 1-0 (IN NAPOLETANO)

admin — Sun, 26 Apr 2009 21:20:42 +0000

Mò che c’e dato
‘sta soddisfazione,
Mourì,
te dedicammo
‘na canzone…

Oi Mourì

Arapete intervista,
famme sentì a Mourinho,
russo comm’a na scigna,
ca nun se po’ vedè!…

Oi Mourì, oi Mourì,
quantu tiempo aggio perso cu te,
primm’e capì,
c’a vittoria puteva venì;
Oi Mourì, oi Mourì,
t’o penzave ca jeva accussì?
Nun t’avvelì,
Oi Mourì, oi Mourì!

I’ nun truvavo pace,
perdevo contr’a tutte,
e stevo stracc’e strutte,
po’ aggio ‘ncuntrat’a te…

Oi Mourì, oi Mourì,
‘o scudetto t’o tiene pe’ te,
però t’ea stà,
stì tre punte rimangono qua!
Oi Mourì, oi Mourì,
n’ata vota è fernuta accussì,
mò te n’ea ì,
Oi Mourì, oi Mourì!

Clicca qui per vedere il video incorporato.

CAGLIARI-NAPOLI 2-0 (in napoletano)

admin — Sun, 19 Apr 2009 20:00:06 +0000

Segna subbeto, ‘o Cagliari: in partenza.
Nun dammo retta: amma tenè pazienza,
e chillo nuje – purtroppo! – ce l’avimmo.
No, Donadoni: ancora nun ce simmo.
‘O Napule è nu ciuccio, e trotterella:
vulà vulesse, ma le manca ‘a scella.
Pe furtuna, int’a porta, cu sti ciucci
ogge ce sta piazzato Luca Bucci,
ca pure si lle vene nu catarro
è sempe molto meglio di Navarro.
Lavezzi e Blasi nun fanno pertuse:
l’isolane discendono, furiuse.
Cercan’e raddoppià, però nun ponno:
c’è Santacroce, all’urdemo siconno.
Int’a ripresa ‘o Napule è chiù sveglio,
e ‘a palla gira un pucurillo meglio.
Stamme pe’ pariggià? Nun ce se crede:
Lazzari ce castiga in contropiede
Sii chiaro, Marekià: nun vuò restà?
dillo, e accussì te venne, ‘a società.
Chesti toje prestazione, i’ nun m’e spieco:
nun sì slovacco, tu sì zuoppo e c(i)eco!

Clicca qui per vedere il video incorporato.

Napoli-Atalanta 0-0 (IN NAPOLETANO)

admin — Sat, 11 Apr 2009 20:50:36 +0000

Dopp’ o disastro enorme ca ‘nce stato
l’avevana fermà, stu campionato.
Ma ‘o Napule sa comme prutestà:
scenne in campo, però senza jucà.
Pe commentà (pe chesto jammo ‘nfreva)
sulamente na cosa ce vuleva:
c’o San Paolo ce stesse ‘na partita.
Quanno Tommasi sisca ch’è finita,
‘o capimmo: fuje tutta n’illusione.
Qua Pasca e Pasca di Risurrezione!
Donadoni Roberto (“ ‘o Bergamasco”…):
pe mò, ccà abbascio staje facenno fiasco.
So quatto, ‘a quanno sì l’allenatore,
e chesta è certamente la peggiore:
chiù brutta ‘e l’urdeme d’o friulano,
ca certo sta rirenno, da luntano.
Stì giucatore ccà, nun so’ normali!
I’ che stranezza: risultato a occhiali,
ma nun c’è stato niente da vedere.
Nun ne facette, papere, ‘o purtiere,
Navarro: quindi mò niente processo.
Si nun ce steva, ‘o lloro, era lo stesso.
E Datolo, l’acquisto più bislacco?
Ri-datolo, ca c’anno fatt’o pacco!

Clicca qui per vedere il video incorporato.

SAMPDORIA-NAPOLI 2-2 (in napoletano)

admin — Sun, 05 Apr 2009 21:15:32 +0000

‘O singolare è meglio d’o plurale;
sta partita ce l’amma faticata.
Doje punizione c’anno fatto male,
però la punizione nun c’è stata.

Ma fosse stata ingiusta, na sconfitta:
migliora, chesta squadra, a grandi passi.
Quanno pareva ormai ‘ndurata e fritta,
pareggia ncopp’o campo di Marassi.

Che canchero faciste, tu, Pazzini,
e pure tu, grandissimo Cassano?
Chiagniste, comme fanno doje bambini
quann’e fanno “tottò” pe copp’a mano.

Simme venute cà senza Lavezzi
(puttroppo c’o purtajemo, a Navarro!)
Diciste: chisti ccà ‘e facimme a pezzi,
ed invece pigliasteve nu ‘nzarro.

Forse tenete la memoria corta:
o forse è la cuscienza, ch’è cattiva.
C’avite fatte, vuje? Doje tire in porta,
doje gol: e tutt’e doje, palla inattiva.

‘E nuoste, invece, belle. Belle assaje:
‘e capa, ‘o Panterone v’a strunzeato,
e Denis, can nun jucava maje,
stasera è addiventato “ ‘O carro amato”.

Dorià, parite cane bastunate!
Ma che tenite da recriminà?
Mazzarri chiagne, l’uocchie blu, cerchiate:
cerca ‘e fa l’ommo, nun te lamentà!

Clicca qui per vedere il video incorporato.

NAPOLI-MILAN 0-0 (IN NAPOLETANO)

admin — Sun, 22 Mar 2009 21:00:36 +0000

Sentit’ a me: tenete dei bambini?
Portatel’al San Paolo, per vedere
nu granne giocatore: stu Mannini,
ca nunn’a maje tirato areto ‘o pere.

‘A partita accummencia propio male:
nunn’a fanno girà, l’azzurre, ‘a palla.
Zalayeta, iss’o ffà: però al plurale.
Ogne cosa ca tocca, piglia, e ‘a sballa.

Guagliò, simme sincere, chist’è ‘o fatto:
se al posto ‘e chella ualler’e pantera
ce steva, che ve pozzo dì: nu gatto,
se venceva, c’o Milan, ll’ata sera.

Quale uruguagio: chist’è ‘n’uruguaio!
Ma ‘o ciuccio sta in salute: scalcia e raglia,
corre, riparte, nun s’arrenne maje,
e – almeno ai punti – ‘a vence, la battaglia.

Né, propi’a nuje ce l’anno fatto, ‘o pacco.
Quanno fuje? Nu momento, ca v’o spieco:
dint’a porta ‘a mettette lo slovacco,
ma sbandieraje nu guardalinee c(i)eco.

Int’a ripresa, assalti all’arma bianca:
se giarnia, ‘o Milan, chieno de campioni.
‘A squadra sta in gran forma, nunn’è stanca:
ma in questo che c’azzecca, Donadoni?

In poche juorne, già simme brillante?
Ma che: fuje na congiura di palazzo.
L’amme sempe sapute tutte quante:
povero Reja, fuje tutto n’intrallazzo!

Clicca qui per vedere il video incorporato.