NAPOLI-CHIEVO 1-1
26-01-14 - categoria Poesie in napoletano 2013-2014Nisciuno, ‘a verità, po’ stà cuntento
pe chello ca s’è visto contr’o Chievo.
Guagliò, chesto nunn’è ‘o Rinascimento:
simme trasute in pieno Medioevo.
Nun ce stà propio niente ca funziona:
sulo Mertens, scetato e zumpetteante
‘a cumbinato chiù ‘e na cosa bona.
L’ate, so ghiute male tuttequante.
Jorginho, par’a me, nunn’è nu pacco:
so sultanto tre ghiuorne ch’è arrivato.
E pure mò è rientrato, lo slovacco…
Ma tutte l’ate, c’hanno cumbinato?
Maje nu scatto, nu cross, nu tiro a porta:
ce so’mancate ‘a carica, ‘a tensione.
Rafè, ratterafà, mannaggia ‘a morta,
ca si no ccà se mbriaca ‘a situazzione!
‘O scudetto, da mò l’avimmo perso:
pe fa ‘o siconno posto ce sta spazio,
me ce vulesse un Napoli diverso.
S’adda ricomincià da chesta Lazio:
miercurì assera, a Forerotta, in Coppa,
sti lacreme addeventano sorrisi.
O ce mettimmo subito na toppa,
o – guardammoce ‘nfaccia- : chest’è crisi….