Nun c’è piaciuto, no: dicimmuncello.
E’ piccerillo, quasi un tappetiello,
e avette na difficile serata.
Ce sta chi dice già: “Vargascurdata”,
“Ragazzi, avimmo preso n’ata sola”,
e chi canta: “La Vargas tornò sola”.
Ma no: chillo nunn’era ‘o Vargas vero!
Tra tanta criticune, ‘o chiù sincero
è  Mazzarri, c’a ditto: “’A colpa è a mia.
M’aggio fatto piglià d’a frennesia
d’o fa jucà, ed è stato un grande errore:
s’eva primma ambientà. Stu jucatore
è bravo, e l’ho mandato allo sbaraglio.
Ve cerco scusa a tutti, pe’ stu sbaglio…”
Nun t’avvilì, Mazzà. Sì perdunato.
‘O turno, intanto, è stato superato:
p’a Maronna, doje ceri e tre nuvene.
Ma sta vittoria, sarrà stata un bene?