Senza Pazzini, e senza chiù Cassano,
sta Sampdoria nun se po’ guardà!”
Mò chesto dice ‘a gente, ‘a copp’a  mano,
ma nunn’è overo: è  na bestialità.

‘A Samp remmane sempe squadra tosta,
cu Mannini, Guberti e Maccarone.
Cumm’è ca s’a pigliata sta batosta?
Pecchè da qua ce steva nu squadrone!

Nun c’è voluto assaje: nu quarto d’ora
‘e studio. Po’, inquadrato l’avversario
facettemo nu gol, e ancora, e ancora,
fin’o quarto. Incolmabile, ‘o divario,

col Matador che bissa la tripletta
ca già facette contr’e bianconere.
Na partita impeccabile, perfetta,
c’a ponno fa sul’e campione vere.

Edinson, ‘o sapive? Da dimane
fernisce dint’a n’enciclopedia:
no la Treccani, ma la Tre-cavani:
l’accattammo, e ‘a mettimmo in libreria!