Vulimmo fa doje cunte? Ce vò poco:
nun l’avessemo vinta, sta partita,
manco si in campo stevemo ‘na vita,
pecchè ‘o Napule ‘e mò nun tene gioco.

Invece ‘o Chievo ‘o tene: embè, se vere.
E chi se l’aspettava!: sti clivense
so meglio e nuje,  ma meglio in tutt’e sense:
nisciuno ‘e lloro ‘o tira areto, ‘o pere.

Napule, nunn’a fai girà, sta palla!
Cu na manovra lenta e strascenata,
quann’arrive(!), ‘a difesa sta piazzata:
tranquilla, organizzata, in maglia gialla.

Troppe d’e nuoste, fore condizzione.
Tu, Maggio, ere  na spina dint’e rine,
ma mò si troppo muscio: te trascine
come si fosse ‘a fine d’a stagione.

E’ overo, a parlà male nunn’è bello.
ma Cannavaro: tu si’ addeventato
chello ca te sunnave int’o passato:
né, mò si’ tale e quale a tuo fratello!