Canta sempe, ‘a cicala, e  nunn’a smette,
pecchè fa caldo assaje.
Mò, c’ancora ‘o maglione nun t’miette
(nun t’o mettisse maje!),

nu brivido te corre aret’a schiena,
ca te l’ere scurdato:
te sbatte forte ‘o sanghe dint’e vene.
Ripart‘o campiunato!

Mica so’ state poche ‘e cambiamente
dint’e squadre migliore:
‘e ggranne hanno cagnato specialmente
‘e viecchie allenatore.

L’Inter, c’a triunfà c’ha fatto ‘ o callo
storce ‘o musso, ma cagna:
si primma s’affidava al Portogallo,
mò se rivolge ‘a Spagna.

‘O Milan crede molto nel domani,
per tagliare il traguardo:
nun sempe sono Allegri, ‘e brasiliani,
e ‘o mannaje, a Leonardo.

‘A Juve, ca na vota era ‘e Ferrara,
circa aiuto a Delneri,
doppo ca l’a pavata cara e amara.
Ll’auguri chiù sinceri

a tutt’e squadre: ‘a ccà, da questo sito
ch’è sempe chiù cliccato,
ma specialmente al nostro preferito,
‘o Rre d’o campiunato:

‘o Napule. Puntammo molto in alto
chest’anno: ognuno ‘o penza.
Stamme attrezzate per il grande salto:
guagliù, bona partenza!

Chi ha cagnato e scagnato, bene o male,
adda pavà pedaggio:
‘a na machina nova, è naturale,
lle serve nu rodaggio.

Nuje no: nuje mantenimmo l’ossatura,
cu quacche buon innesto.
Ca dell’azzurre s’addà avè paura,
lo capirete presto!

L’attacco (comme no?) farrà sfracelli:
lo vedrete domani.
Ma comm’e cuntrastate, a Lucarelli,
a Lavezzi,  a Cavani??

Napule, jamme  jà. Chest’è ‘o mumento:
partì buono cunvene.
‘O mare è calmo, ‘o tien’ n poppa ‘o viento:
va’, te vulimmo bene!

Valid XHTML 1.0 Transitional Valid CSS!