L’anema nun se sape si ce stà.
Uno ce crere, n’ato nun ce crere.
Nun tene cuorpo, nun se po’ tuccà:
ma si ce stà, v’o giuro, ca se vere.

‘E Napule s’è sempe ditto tutto:
ce sta ‘a camorra, ch’è na piaga antica.
‘O futuro se fa sempe chiù brutto,
niente funziona, nun ce sta fatica.
Ma l’anema – nunn’è na nuvità –
a Napoli l’avimmo sempe avuta:
sì, certi vvote è n’anima/lità,
ma sta sempe appicciata: mai se stuta.

Aiere, pur’o Napule ‘a teneva:
ma mò so’ quase n’anno ca le manca.
Si veneva ‘o mumento ca serveva,
‘ a squadra jeva annanze all’arma bianca.

Mò st’anema addò sta? Se n’è scappata.
Facettemo “toc toc” vicin’a porta,
ma non c’arrispunnette: s’è stutata,
è addiventata moscia, meza morta.

E invece la tenevano, ‘e romane.
Quanno steveno sotto; quasi cotti,
se n’è trasuta dint’o capitano,
‘o preferito suo: Francesco Totti

che d’a Roma è ‘o pilastro: il punto fermo.
Ilary sbatt’e mane al suo Pupone:
‘o Blasi nuosto mò joca a Palermo,
e s’è purtato l’anema: ‘a passione.

Ha ditto ‘o Presidente, “Da dimane
s’adda cagnà. St’inizio fuje nu fiasco.
Mò piglio tutte cose dint’e mane!”
Core napulitano, o bergamasco?

Né, chesta storia ‘a tene, na morale?
Gnorsì. V’a conto, si m’o permettite.
Napule, m’ea risponnere, al finale:
quann (all’anememammeta!) te scite??

[youtube]http://www.youtube.com/watch?v=_hZVqw470Vw[/youtube]

Tags: , , , , , ,

Valid XHTML 1.0 Transitional Valid CSS!