Dice ‘a grammàtica: ‘a parola è sdrùcciola
quanno l’accento va ncopp’a terzùltima
(stamme parlanne, è lògico, d’a sìllaba).
Scrivette Bartezzaghi, su Repùbblica:
“Riàlzati” è nu slogan ca fa rìdere.
Nunn’o vire ch’è na parola sdrùcciola?
T’aìze, e doppo faje nu capitòmbolo!
Proprio chesto è succieso al nostro Nàpoli:

a Livorno se sollevaje pe n’àttimo,
e po’ è caruto n’ata vota a Gènova.
Contro ‘e tre squadre ca ce so chiù sìmile
(ca pure lloro, comm’a nuje, so sdrùcciole:
e so’ l’Empoli, il Càgliari ed il Gènoa),
ncopp’a diciotto punte conquistàbbile
n’amme fatt’uno: un record invidiàbbile!